Danza e Poesia

Josi e Viljam

Josi e Viljam de Dolina, quel paese la zò in vale
La de “Shanti” ve incontravo qualche volta nele sale.
Dopo un giorno, no so come, ela fa: - “Vien a danzar”
Xe sta come un forminante e me son sentì scaldar.

Conossù ve go per caso, caminando per destin proprio sula stesa via
Fato sta che adesso in vena sento tanta più energia.
No mancava l’entusiasmo, ma te sa stando in pension
Te se pensi rilassà, come un gato in un canton.

Me gavè insegnado robe, che gavevo dentro zà.
Ma le stava indormenzade. Le se gà pian pian sveià.
Gò de novo quel bon estro, la poesia me torna fora
Come qualche anno fa quando un mulo jero ancora.

Con la musica, la danza, tuti insieme, senza tanta confusion
La condimo col bon cuor. Xe perfetta la pozion.
Voi sicuro no sé maghi ma gavè questa riceta.
Per cavar tension, tristezza e la vita far più s’ceta.

Josi e Viljam, un’invenzion, come dir, una scoperta.
E la porta dentro in petto, la xe quasi sempre verta.
Per accoglier i vostri amici in un nido e abbracciarse.
Due parole, come rose, e l’amor per coccolarse.

Cossa far per ringraziarve, forsi che no servi gnente.
Xe zà bon quel ritrovarse ogni volta, corpo e mente.
La beleza, l’energia e quela pase adesso in sen.
Le camina a fianco a voi, come dir:- “…ve voio ben !” –


Guido Frausin
febbraio 2007